Wo stani u wo steisch du?

  M. Bürki  –    12. Februar 2021

Wo me steit im läbe isch mängisch nid eso ganz klar
Wöu wenns ganz klar wär denn wär s ja glasklar und das isches goubeni nie

Wie isch das bi dir?
Steisch du klar im läbe?
Blibsch nie chläbe?
U läärsch nie öppis dernäbe?
Denn isch guet!

weiterlesen >

Was seisch?
O scho usgläärt?
Scho guet chas gä isch mir doch o scho passiert
Isch mönschlich chas gää im läbe
Chunt vor
I de beschtä familie

Auso wo stand iiig im läbe?
Ig bi vierzgi worde
Dhäufti isch düre
Oder nid?
80gi wär es schööns auter
mi grosspappi isch 94 gi worde
schafeni das ächt ou?

Wo stani im läbe?
I dr mitti zimlich im zäntrum
Es brodlet u tuet und macht u wäuelet
Mängisch ganz schön fescht

Wo stani im läbe?
A mene guete punkt würdeni meine
A mene punkt wo mi nümme aues grad uf d paume bringt und amene punkt wo ni chli weis was i wott

Und du?
Wo steisch im läbe?
Masch es grad häbe?
Dis läbe?
Oder treits di grad eso chli im züg umenang?

Wo steisch im läbe?
Und wo wotsch hi?
Jetzt und i dr zuekunft?
Morn?
Imene monet?
I drü jahr?

Wo steisch im läbe?
Isch gott wit ewäg oder nöch?
Was isch gott überhoupt und bruchts dä de hüt no?

Für mi isch gott mängisch wit u mängisch nöch…
Aber immer presänt. Jede tag
Mängisch me und mängisch weniger

Wo steisch im läbe?
Im bezug uf dini pruefswau?
Weisch scho wo s häre geit oder hesch no kei blasse?

Wo stani im Läbe?
I blibe iz no 25 Jahr hie jugendarbeiter in allschwil!!
Neeei…das chani mir iz chum vorsteue..aber wär weiss es scho

Wo steisch im läbe?
Mit dine beziehige und fründschafte?
Aues im grüene oder mägisch ou chli orange oder sogar rot?

Wo stand iii im läbe?
Mini beziehige si stabiler und klarer worde. Ig weis was i wott und uf was i kei luscht me ha..

Wo steisch im läbe?
Mit covid und abstand haute?
Wie geisch mit au däm um?
Geiz dir guet oder schlächt oder üppis derzwüsche?

Wo stand ig im läbe?
Covid närft und ig ma nümm eso wie am afang und doch müesse mir no chli dürehebe…

Wo steisch im läbe?
Was isch di näscht schritt?
Bruchsch hiuf oder chunsch vür?
Wo stand ig im läbe?
Ig di da wenn d frage hesch u lose dir zue. Red mit dine fründe und eutere oder gschwüsterti wennnd stress hesch…

Wo steisch im läbe?
Mau es chritt füre und denn wider eine zrügg? Ja das ghört derzue!

Wo stand ig im läbe?
Meh füre aus zrügg und mängisch ou zrügg.. ou bi mir ghört das no derzue…

Ig wünsche dir uf dim wäg gottes säge und vili gueti mönsche und gspräch wo di stütze und trage.

Amen